Што рабіць, калі пасля рамонту дарогі бардзюр не адпавядае нормам

Адзін з варыянтаў — напісаць скаргу

Разбяромся, хто за што адказвае:

1) Рэмаўтадар кожнага канкрэтнага раёна.
Адказвае за рамонт вуліц.
Падпарадкоўваецца адміністрацыі канкрэтнага раёна.
Напрыклад: Рэмаўтадар Маскоўскага раёна.

2) Раённы аддзел ДАІ.
Адказвае за бяспеку дарожнага руху. Ускосна зацікаўлены, каб вуліцы былі ў парадку, каб раварысты з-за вызокіх бардзэраў не вылазілі на праезную частку.
Падпарадкоўваецца УДАІ ГУУС Мінгарвыканама.
Напрыклад, АДАІ Маскоўскага раёна.

3) Раённая пракуратура.
Кантралюе датрыманне законнасці. У парадку нагляду можа выносіць прадпісанні аб выпраўленні парушэнняў.
Падпарадкоўваецца пракуратуры Мінска, тая — Генеральнай пракуратуры.
Напрыклад, пракуратура Маскоўскага раёна.

4) Нарэшце, сама адміністрацыя раёна.
Напрыклад, Адміністрацыя Маскоўскага раёна.
Адказвае за раён у цэлым.
Падпарадкоўваецца Мінгарвыканаму.

5) УДАІ ГУУС Мінгарвыканама.
Адказвае за бяспеку дарожнага руху ў горадзе. Ускосна зацікаўлена, каб вуліцы былі ў парадку, каб раварысты з-за высокіх бардзюраў не вылазілі на праезную частку.

6) Мінгарвыканкам

7) Інспекцыя Дэпартамента кантролю і нагляду за будаўніцтвам (па г. Мінску і спецыялізаваная, якая якраз і адказвае за будаўніцтва дарог)
Кантралюе выкананне будаўнічых нормаў і ў працэсе будаўніцтва.
Падпарадкоўваецца Дзяржстандарту.


Парадак падачы скаргаў:

1) Рамаўтадару — з патрабаваннем прывесці вуліцу ў адпаведнасць з нормамі.
Адначасова можна яе прадубляваць у раённы АДАІ і раённую адміністрацыю. Лішнім не будзе. Яны яе ўсё адно «спусцяць» уніз у Рамаўтадар. Але нам важна апавясціць іх і атрымаць ад іх адказ.

Узор скаргі

Як падаваць звароты (скаргі):
Калі ёсць электронная прыёмная на сайце — праз яе ці электронным лістом на e-mail. На наступны дзень пасля адпраўкі тэлефануеце ў канцылярыю (аддзелы па рабоце са зваротамі) і цікавіцеся, ці атрымалі вашы звароты. Атрымліваеце рэгістрацыйны нумар.

Калі электроннай пошты няма — звычайнай поштай (заказным лістом). Таксама можна занесці асабіста ва ўстанову. Таксама атрымайце рэгістрацыйны нумар.

Адказ у звароце заўсёды запытвайце поштай (гэта значыць у пісьмовым выглядзе).

Адказ павінен прыйсці цягам 15 дзён.

Заадно можаце скінуць нам інфармацыю пра тое, што вы робіце, на info@bike.org.by.
Мы хочам адсочваць і разумець, якія крокі паспяховыя, а якія не.

Калі першы крок будзе безвыніковым — пішам вышэй. У адказе на зварот вам павінны будуць пазначыць, дзе яго можна абскардзіць.